فكرت أكتب التدوينة دي في شكل مقال قصير أو في شكل نقاط سريعة و منجزة و قررت اني أكتبها في نقاط علشان محدش يزهق و باللغة العامية كمان. من العنوان باين ان المقالة دي للحشد ليوم 18 نوفمبر (الجمعة القادمة).
أول حاجة هتقولها هتقول اننا خربنا البلد و بوظنا البلد...هقولك خربناها في ايه؟؟
هتقولي البورصة واقعة و البلد كلها بلطجية و البطالة زادت بعد ما شركات كتير طردوا الموظفين و مفيش استثمار أجنبي و اسرائيل بتهددنا و مفيش فلوس في البلد و في غلاء للأسعار.
طيب نمسك نقطة نقطة بقي و نجاوب باختصار كدة...
أول نقطة موضوع البورصة, لما تطلع صحيفة تقولك البورصة المصرية اليوم تهبط 30% هقولك هل تعلم أن البورصة ماينفعش تهبط أكتر من 10% في اليوم الواحد و ماينفعش برضو تزيد أكتر من 10% و المعلومة دي بحكم دراستي المتواضعة للاقتصاد و من كلام بيشتغلوا في البورصة بيقولوا ان البورصة بتزيد و تقل و ماشية بمعدل طبيعي لما كان متوقع بعد الثورة.
موضوع البلطجية ده بقي يطول الحديث فيه...هل تعلم أن جهاز الشرطة لديه بيانات كل البلطجية في مصر و لو تم تنسيق بين العسكر و الداخلية هيلموا البلطجية في يومين؟؟ و البلطجية هنا أقصد بيهم من يمارسون البلطجة كمهنة و هؤلاء هم الخطر الحقيقي أما من مارسوا البلطجة بعد الثورة في شكل سرقات فردية دول غلابة و هيتقبض عليهم في يوم و ليلة لو جهاز الشرطة احترم نفسه و اشتغل بضمير و وقتها الظباط هيلاقوا الشعب بيشتغل معاهم أساسا, و اه العسكر سايب البلطجية بمزاجه حتي يترحم المواطن الغلبان علي أيام مبارك حيث الأمن المزعوم.
هتقولي البطالة زادت, هقولك عندك حق بس هقولك برضو ان في وظايف كتير جدا متاحة بس محدش بيرضي يشتغلها لأنها بتكون مرتباتها 400 جنيه و 500 جنيه فا نادر لما الشباب بيوافقوا يشتغلوا فيها...و الحل هنا هو حد أدني للأجور 1200 جنيه...هتقولي طب ما كدة مفيش فلوس و هنطبع فلوس و يحصل تضخم ؟؟ هقولك مش هنطبع ولا حتي ورقة بخمسة زيادة, بس هنطبق حد أقصي للأجور كمان و هقولك مثال:
لو واحد مرتبه 10,000 جنيه و واحد تاني مرتبه 500 جنيه هاخد 2,000 جنيه من أبو عشرة و يكون مرتبه 8,000 و هوزع الالفين دول علي أتنين موظفين حتي يكون مرتب كل منهم 1,500 جنيه...بسيطة و سهلة بس العسكر مش عايز يطبقها.
الاستثمار الأجنبي مش موجود أو قليل جدا و يعود بشكل بطئ جدا و ده حقيقي....بس هيرجع هيرجع لأن هذا البلد بحكم موقعه الجغرافي و الأثار و تاريخ هذا البلد عمر ما الاستثمار ما يغيب عنها و طبيعي أنه يقل يا جماعة لأننا عاملين ثورة و طبيعي انه يعود بعد الغياب و لكن بعد استقرار البلاد...امتي الاستقرار يحصل؟؟ لما يتم تسليم السلطة لرئيس مدني و العسكر يرجعوا أماكنهم الطبيعية.
اسرائيل بتهددك؟؟ افتكروا لما قبل التنحي بيوم و كان يوم الخميس 10 فبراير لما كنا في الميدان و طلع اشاعات ان اسرائيل جهزت قواتها علي الحدود و أمريكا أرسلت بوارج حربية عند قناة السويس و الكلام ده كله...أحب أقولك ان مفيش حاجة اسمها كدة في المجتمع الدولي هي مصر أصلها مش حديقة عامة و أي حد يدخلها في أي وقت و موضوع البوارج الحربية الأمريكية دي كدة كدة موجودة علي طول في المياه الدولية و لما الجيش بتاعني قدر يحمي القناة لم يتدخلوا...و لو انت خايف من اسرائيل خلي المجلس العسكري يسيب السياسة لأهل السياسة و يرجع يركز في الحدود.
موضوع الغلاء و اختفاء الكثير من السلع ده بسبب عدم وجود أليات و مؤسسات للرقابة و لأن السلطة الأن في يد العسكر و هو مهما حصل لم و لن يسطيع ادارة شؤون البلاد...السياسة مش للجيش يا جماعة...لو جبت لعيب كراتيه و قولتله يلعب كورة هيحصل ايه؟؟ هيضرب اللعيبة صب عنه و يمارس العنف...طب لو خليته يكون مدرب أو رئيس نادي؟؟ هيخرب النادي طبعا, السياسة مش للجيش يا جماعة الجيش المصري عظيم لكنه الأن يخسر الكثير و يخسر التاريخ....التاريخ لن يذكر محاسن لهذا الجيش العظيم لأنه "خربها و قعد علي تلها"
طيب و بعدين يعني عايز ايه من كل الرغي ده؟؟ عايز أقولك أن كل ده سيتم حله اذا تم تسليم السلطة لرئيس مدني.
هننزل يوم 18 نوفمبر نقول للعسكر يسلموا السلطة في معاد أقصاه مايو 2012 يعني بعد سبع شهور من الأن .
نقاط مهمة:
- يتم محاكمة أكثر من 12 ألف مواطن مصري بمحاكمات عسكرية غير شرعية و الكثير منهم نشطاء سياسيين يعني الي بيقول رأيه بيتحاكم عسكريا...ده مبارك معملهاش!!!
- وثيقة علي السلمي و التي يسعؤ لها العسكر تعطي للعسكر مطلق السلطات و تجعل من الرئيس قائد أعلي لمجلس الدفاع الوطني...يعني قائد أعلي للقوات المسلحة زي المخلوع مبارك!!!!
- العسكر أصدر بيان فيه الجدول الزمني للانتخابات التشريعية و الرئاسية و فيها انه هيفضل في السلطة حتي يناير 2013 !!!!
- هل تعلم أن في أسوان من يومين تم مقتل مركبي غلبان علي يد أحد أمناء الشرطة؟؟ بس شهادة حق تم تحريز سلاح الأمين...بس لسة الداخلية بلطجية!!
- علاء عبد الفتاح المدون و الناشط المعروف تم استدعاؤه و حبسه و اتهامه انه أتلف منشئات للقوات المسلحة و حيازة سلاح و تجمهر و اعتداء علي أفراد من القوات المسلحة في أحداث ماسبيرو...لو سوبرمان مش هيعمل ده كله و لا تعليق.
دي صورة للقوات المسلحة مع احدي الصحفيين العزل و ما خفي كان أعظم!
أنا طولت عليكم أوي و مش هطول أكتر من كدة شوف الكلام الي فوق و حكم ضميرك و أعمل حاجة علشان خاطر البلد و علشان خاطر ولادك يعيشوا في بلد محترم و بكرامة و يكونوا فخورين بيك لما يكبروا و مايقولوش بابا كان ماشي جنب الحيط و خايف و ساب البلد تضيع زي ما احنا ما قولنا لأهلنا...حكم عقلك!!
اوعي يا مصري تخون أفكارك...مجلس عسكر هو مبارك!!
ليست هناك تعليقات:
إرسال تعليق