مش هطول عليكم المرة دي و هختصر كل حاجة...و هتكلم في شكل نقط مش كلام انشا
يوم 3 مارس
عصام شرف من الميدان: انا استمد شرعيتي من الميدان و اذا لم تساعدني جهات الدولة (قصده المجلس العسكري) لتنفيذ مطالب الثورة هنزل و اعتصم معاكم بنفسي
أمن الدولة
يوم 5 مارس تم اقتحامها علي مستوي الجمهورية و تم اخراج اطنان الورق المفروم و تم حرق اطنان الملفات و الاوراق و صدر قرار بحل أمن الدولة...هل تعلم أن لم يتم أي حل بل تم تغيير أسم الجهة الامنية من امن الدولة للأمن الوطني.
هل تعلم ان الظباط اللذين قاموا بتعذيب السيد بلال و قتلوه سافروا في بعثة تدريبية رسمية من الداخلية, و لم يتم او يجري اي تحقيق في هذه الملفات أو اي تحقيق عن سجون امن الدولة الغير قانونية.
موقعة 8 ابريل
مشاركة بعض الظباط في تظاهرات يوم الجمعة 8 ابريل و انضمامهم للاعتصام ادي الي هجمو الشرطة العسكرية علي الاعتصام بليل و قتل في هذا الهجوم علي ماهر شاب عنده 17 سنة برصاص حي...اتهم رجل الاعمال ابراهيم كامل في أعمال العنف في اليوم ده و تم استدعاؤه و حبسه 15 يوم...بعد فترة خد براءة و المجلس لم يعلن من المسؤل عن دم علي أو اتهم أي جهة أو اي حاجة و سكتم بكتم و كأن شيئا لم يكن.
حبس مبارك
قبل اي حاجة كدة بس قرار حبس مبارك ده ما هو الا قرار يعني بالصلا ع النبي هو غير محبوس...هو صدر قرار بحبسه و لم ينفذ بحجة انه عيان...و طبعا كلكم بتقروا و تشوفوا كل يوم و التاني لما مدير المستشفي يقول مبارك صحته مستقرة لكن نفاجأ انه بردوا لم ينقل لحد ما بقي عندنا يقين انه مش هيخرج لدرجة اننا بقينا نتخانق علي جنازته ازاي تكون عسكرية...ياااه ده احنا غلابة أوي
جنازة عسكرية ازاي؟؟
جنازة عسكرية يا رفاق يعني ايه بقي...كلنا متفقين ان 90% مش هيصدر حكم جنائي ضد مبارك طيب و معناه ايه بقي؟؟؟ معناه انه لما يتوفي يتعمله جنازة عسكرية, اقولكم بقي ايه هي الجنازة العسكرية...شوارع هتتقفل علشانه, علم يتنكس, قرأن في الاذاعات و المحطات الرسمية لمدة ثلاث أيام...و قانونيا علاء و جمال و سوزان بيكون ليهم الحق في حضور الجنازة و هنشوفهم في الصفوف الاولي بالبدل و وقتها ركزوا فيهم كويس ليه بقي؟؟ علشان مش هنشفهم تاني...هنعرف انهم طلعوا ع الرياض مع الشيخ كنافة عاهل السعودية الشقيق الصديق مهيب الركن. ده ان ماكنش علاء هناك اصلا.
لعبة المحاكمات الهزيلة
محاكمات كلها في التربح و الكسب و قضايا مالية فقط و لم يحاكم اي مسؤل بسبب افساد الحياة السياسية أو قتل المتظاهرين و المحاكمات كلها تأجيلات في قصة هزيلة بطلها النائب العام و القضاء الغير مستقل و الظباط المتهمين أحرار طلقاء و منهم من يضغط و يبتز المصابين و أهالي الشهداء و طبعا الكل لابس أبيض لسة ماحدش خد حكم غير العادلي و المغربي و كام واحد بس الي لبسوا الازرق.
وزارة الداخلية
"ائتمناهم علي أمننا فقتلوا أولادنا"
علشان انا مقرر ماطولش عليكم مع ان الداخلية محتاجة اسبوع اكتب عنها بس مش هتكلم عنهم المرة دي...
منصور العيسوي قال معندناش قناصة!!!
يوم 28 يونيو تم مواجهة الثوار أكثر من 10 ساعات و كان في صفوفهم بلطجية بل و كان في مجند يستفز الثوار برقص و حركات نابية و ظابط في مدرعة يشتم و يسب الثوار و كل هذا موثق بالصوت و الصورة.
عن حركة تطهير الداخلية: الأول كدة مش تطهير بل هي حركة تنقلات واسعة و من ابرزها هي نقل سفاح المحلة في 2008 لمديرية أمن الاسكندرية و نقل وائل الكومي قاتل ثوار الاسكندرية لشرطة الكهرباء و ترقيته!!! سامعكم بتقولوا الفاظ قبيحة...
هل تعلم
- عودة السباعي لمكتب الطب الشرعي.
- تخوين الثوار و اتهامهم بالعمالة الاجنبية بالظبط زي عهد مبارك و الكنتاكي و الاجندات و كدة.
- تحريض واضح من احد قادة المجلس العسكري و قبلها اعترف انه يروج الاشاعات من اجل تحريك مشاعر الناس زي ما هو عايز (محرض و اهبل علي رأي محمد صبحي).
- المسيرة التي ذهبت من التحرير للعباسية كانت ذاهبة للمجلس العسكري في نوع من الضغط لتفيذ المطالب لأن كما نعرف لا ينفذ المطالب الا بالضغط و قد وقفوا في أخر نقطة وصلوا اليها عند مسجد النور و عندما ارادوا العودة فوجئوا بمحاصرتهم من البلطجية و ضربهم بالطوب و المولوتوف و هناك تصوير و شهادات و علي فكرة اول صف عساكر كانوا بيبكوا من الي شايفينه.
- اختلاف و تفرقة القوي السياسية ليس في صالح الثورة أو البلد...يجب توحيد الصفوف و توحيد المطالب و الضغط القوي من جميع التيارات و عدم التركيز فقط في المصلحة الشخصية
سؤال: هل نحن مازلنا في يوم 24 يناير؟؟
بعد 6 شهور دم الشهدا في رقبتنا..يا نموت زيهم يا نجيب حقهم.
قائد الجناح العسكري
والله الموفق و المستعان.
الكلام كله حلو قوي .. بس أعتقد بعد ماشفناهم في القفص ماعتقدش إن نظرية المؤامرةدي نافعة .. انهم أصلا بره مصر والكلام ده كله وهم
ردحذفغير كده كل كلامك حلو