الشعب يريد الذكاء الثوري

التفكير هو الحل!!

كل سنة و انتوا طيبيين و رمضان كريم و أول رمضان من غير المخلوع و رمضان الثورة و كل البرامج عن الثورة و يعني رمضان استثنائي بكل المقاييس.

مش هتكلم كتير علي احداث امبارح بتاعت اقتحام الميدان و فض الاعتصام بهذا الاسلوب. و لكن هتكلم معاكم في نقطة تانية لازم تكون نقطة توافقية بيننا كلنا لأننا شوفنا كلنا امبارح بعد ما الميدان اتفتح كانت العربيات ماشية بتزمر و يهتفوا للجيش و كل الافلام دي, طب و ليه ده كله؟؟ ليه مانحكمش عقولنا؟؟ ليه فتح الميدان ماكنش ييجي مننا؟؟ أي دولة في العالم طبيعي انه يتم تعليق الاعتصام و اعطاء جدول زمني محدد ثم العودة مرة اخري للاعتصام بشكل أقوي بالذات انه يومي السبت و الاحد كانت المشاكل وصلت لأعلي مستوي و الي حد الغليان مع اصحاب المتاجر و المحلات و الاهالي و الي كان في الميدان شاف و ماكنش عيب ان يبقي في حل توافقي بتعليق الاعتصام و حتي ننزل نفطر في الصينية و نصلي التراويح و نتسحر و كل حاجة و نروح بيوتنا بعد كدة كشكل من اشكال تعليق الاعتصام و اكتساب الناس و الاهالي و أغلب الشعب في صفنا لأننا كدة بخسر الشارع و الناس و الشارع و الناس هي الشرعية علشان نكون واقعيين و نتكلم بصراحة, انا عارف ان في كتير هيكونوا ضدي بس علشان محدش يزايد احنا قاعدين و كنا في الاعتصام و في نفس الوقت كنت مع ان الميدان يفتح يوم الاحد مننا احنا و كنا هنكسب أرض زي ما بيقولوا بدل ما احنا عمالين نخسر كل يوم و لو شايفيين ان المجلس العسكري هو الي في مواجهتك دايما فا المجلس العسكري هو الي بيكسب الشارع و الرأي العام في صفه ضدنا و من ثم ضد الثورة و الثوار, طب ليه مانعملش احنا الشئ الي عايزه الشارع في الوقت الصح...تعليق الاعتصام من يوم الاحد لحد أخر رمضان مع الحفاظ علي اننا ننزل و نفطر مع بعض و نصلي جوة الصينية كأفراد عاديين زي الاهالي الي بيكونوا عايزيين ينزلوا الميدان عادي بدون اعتصام مش هيكون فيها حاجة و تخيلوا لو كنا كسبنا الشارع و فتحنا الميدان بنفسنا, يوم ما فتحنا المجمع و كتبنا عليه مفتوح بأمر الثورة احسن ميليون مرة لو كان الجيش فتحوا...ياريت نحكم عقولنا و نكسب الشارع و نبطل نخسر و يبقي في توافق و تفاهم و محاولة ارضاء اغلب الاطراف علشان نكسبهم في صفوفنا و الله الموفق و المستعان.

               تويتات قائد الجناح العسكري عن الموضوع

يا رفاق حكموا عقولكم و مش كل حاجة تعصب و شتيمة و تعامل بعنف و ترويج اشاعات بقي لقد هرمنا من كدة #egypt #tahrir #fact #bey2ollak #ramadan

#egypt #tahrir #thoughts ماتمشيش ورا حد و سيبك من من التسخين علي تويتر الي كلنا بنسخنه ده و حكم عقلك قبل ما تتعصب و اتأكد من مصدر اي خبر

#egypt #tahrir #thoughts انا مع الاعتصام لكن بردوا مع استخدام الذكاء و كسب الشارع و الرأي العام في صفوفنا و هوضح يعني كسب الرأي. يتبع

كسب الرأي العام يعني توصل كلامك لكل وسائل الاعلام و مش كل سوية تطرد من الميدان قناة فضائية، توصل للاغلبية من الشعب الحقيقة #tahrir #thoughts

#tahrir #egypt #thoughts عدم ارتكاب افعال مثل طرد حمزاوي او صفوت حجازي و لو كانوا ولاد وسخة لأنه لا يحق لنا هذا و لأننا نريد كسب الشارع

عدن التعصب الاعمي للميدان لأننا لما نتكلم مع ناس ضدنا هما في الاخر اهلنا بلاش نخسرهم لازم نكسبهم في صفنا، #tahrir #egypt

#tahrir #thoughts تخيلوا لو كل يوم كل ثائر جاب معاه اتنين و بدأنا نكسب الشارع فعلا، لان الحقيقة دلوقتي ان الاغلب بيشتموا فينا

وتخيلوا لو كنا احنا الي فتحنا الميدان امبارح مش الجيش، كانت هتفرق مليون المية لصالحنا #tahrir #thoughts #egypt

#tahrir #egypt #thoughts احنا بقينا عاملين زي فريق الكورة الي بيجيب اجوان في نفسه...لازم نكسب ناس في صفوفنا و نحكم عقولنا في التصرف

لعبة و بتتلعب علينا، لازم نكون اذكياء و نلاعبهم و نكسب الرأي العام و الشارع في صفنا #tahrir #egypt #thoughts

#tahrir #thoughts #fact تحكيم العقل عمره ما كان كسكسة ولا خوف بس اوقات بيكون الذكاء مطلوب لكسب الرأي العام

                                                                                                                               قائد الجناح العسكري