خرج من الباب الضيق و تاه وسط الجميع و لقي منهم و منهم

ثم خرج من هذا المكان المظلم و بدأ في اكتشاف العالم من حوله ... وجد الكثير من الأشياء الغريبة, أو علي الأقل بالنسبة له, كل الناس غريبة و منهم صاحب الفكر و منهم اللي بيتساق ورا الفكر و خلاص, منهم اللي عنده قضية بيدافع عنها و منهم اللي بيدافع عن القضية و هو مش فاهم هو ليه بيدافع عنها لكنه بيدافع عنها عشان بس شايف اللي حواليه بيدافعوا عنها... يمكننا أيضا أن نقول أنهم استغلوا الحماس الداخلي و تم توجيه تلك الطاقة لأهداف البعض. منهم من يحب شخص و هذا الشخص يحب أخر و الأخر يحب أخر و هكذا و كأننا في دائرة مفرغة أو في طابور طويل و الجميع ينظر لمن أمامه فقط و يحبه ولا يلتفت خلفه ليري من يحبه...منهم العشوائي و منهم المنظم, منهم من عشوائيته منظمة و منهم من نظامه عشوائي و غير منظم...منهم من يؤمن بوجود الله و منهم الملحد, منهم من يؤمن بوجود الله و لكن أفعاله عكس هذا و يوجد ملحدين أفعالهم كأنهم مؤمنين...منهم المنافق, ينافق من اجل منصب وظيفي أو ينافق لإغاظة الأخرين أو ينافق لكسب الناس و تقديم الولاء لهم أو ينافقهم لأنهم أنجح منه و يريد التقرب منهم أو من أجل جوازة أو لإرضاء أي شخص أو طرف لتحقيق هدف شخصي....منهم من يتم التلاعب به و بعقليته بمنتهي السهولة و يتم تحريكه....منهم المهندس الذي يعمل في مكان ممتاز و أسرته سعيدة و ميسور الحال و لكنه غير راض عن حاله و ناقم عن العيشة و مش بيشكر الرب....منهم العامل البسيط الذي يحمل هموم الدنيا فوق رأسه و عاتقه و لكنه مبسوط و يحمد ربنا...منهم اللي كل همه انه يشوف اللي حواليه مبسوطين و فرحانين و كل عزيز عليه يكون سعيد لكن في أول فرصة بيترمي في الزبالة, و منهم اللي ولا بيهمه حد من اللي حواليه ولا بيفرقوا معاه لكن هما بيعاملوه كأنه ملك زمانه...و منهم و منهم و منهم

شــــوف أنـــت مــــــيـــــن فــــيــــهـــم 

بس يا سيدي و مرت سنة و كأنك يا أبو زيد ما غزيت

حكم عقلك و اختار صح ده وقتك...سيب الكيبورد و انزل للشارع

سلام عليكم...بقالي كتير أوي ماكتبتش حاجة و ده لعدة أسباب أولهم لأن فعلا مفيش حاجة ممكن تخلي الواحد يعرف يكتب, هكتب ايه ولا ايه ؟؟ عن الانتخابات ولا انتهاكات العسكر ولا عن قتل العسكر ولا الكدب ولا تخوين الثوار ولا سلبية كثير من الشعب بسبب تصديقهم للعسكر أو حتي لو مش مصدقين لكن مؤيدين له بحجة الاستقرار و عجلة الانتاج و الكلام اياه الي تعبنا منه...

علي العموم الكلام بتاعي المره دي مش موجه للثوار لكنه موجه لكل من يسب و يلعن عندما يسمع كلمة ثائرو مش هطول عليكم !!

تعالوا نرجع بالزمن كدة؟؟ زي النهاردة من سنة و ليلة يوم 25 مكانش حد عارف ولا متوقع ايه الي ممكن يحصل, نزلوا الشباب و كانوا فاكرين انهم شوية و هيرجعوا البيت أخر اليوم و خلاص, مر اليوم و الأمن استخدم العنف و خلص اليوم و بعد يومين نزل الملايين في تسع محافظات و استخدم النظام وقتها العنف و القتل لكسر و احباط قطار الثورة لكنهم كانوا مع كل شهيد يكسرون لكن يكسرون الخوف داخل الشباب, مرت الأيام و جاء يوم التنحي ليخرج الجميع الي الشوارع نحتفل و نهتف للجيش و نرفع الظباط و العساكر علي الأكتاف...اضحكوا يا ثورة

الجيش المصري محدش عايز يدمره ولا يسقطه زي ما في اعلام بيقول كدة و مفيش حد عايز يخرب البلد يوم 25 ولا حاجةو الي هيحاول يخرب البلد احنا الي هنقطع ايده قبل ما يفكر يعمل كدة و الي بنعمله هو اننا بننتقد المجلس العسكري كسلطة سياسية و ليست عسكرية لأنهم الأن يقومون بمهام رئيس الجمهورية و هو منصب سياسي و مبادئ السياسة هي الديمقراطية و اننا ناخد و ندي لكن للأسف الي بيحاول يتكلم بيضربو يتسحل و يتسجن أو يقولوا عليه بيعمل مظاهرة فئوية بالنسبة للمصانعو الشركات و كل الي احنا عايزينه اننا نحافظ علي سمعة هذا الجيش العظيم و عدم الاحتكاك به وهذا لن يتم الا اذا رجعوا الي ثكناتهم لأنهم فشلوا في ادارة البلاد و كل يوم زيادة لهم سيجلب عنف و مشاكل و فشل و انحدار أكثر للبلاد...هل حد فيكوا يفتكر ان السياحة ترجع لما يكون العسكر بيحكم ولا لما يكون العسكر خرجو جالنا رئيس منتخب ؟؟ خدوا المثال بتاع السياحة ده و شوفوا علي كل حاجة تانية و قولولي بقي الاستقرار هاييجي في ظل العسكر ولا لما يمشوا :))

بدأ من يوم 26 فبراير انتهاكات العسكر و الاعتداءات علي الشباب بدأت رحلة المحاكمات العسكرية للثوار !!! قبل الثورة كان الناشط السياسي بيتحاكم مدني و يتسجن في أمن الدولة...بعد الثورة الناشط السياسي بيتحاكم عسكريا يا ناس أفلا تعقلون ؟؟ و استمر سيناريو اعتداءات العسكر من 9 مارس و بعدها 8 أبريل و قتل الشاب علي ماهر ابن ال17 سنة و قالوا المسؤل عن أعمال الشغب هو رجل الأعمال ابراهيم كامل و بعد ان تم استدعاؤه و حبسه 15 يوم تم الافراج عنه و لم يعرف أحد حتي يومنا هذا من المسؤل و يوم 15 مايو عند السفارة الاسرائيلية (بدون ان يعتدي أحد علي السفارة) و يوم 28 يونيو و الاعتداء علي أهالي الشهداء و يوم 23 يوليو في العباسية و أول رمضان و يومها تم تدنيس مسجد عمر مكرم من عساكر الشرطة العسكرية عندما دخلوا بالبيادات و سبوا الدين داخل المسجد و انتشرت فيديوهات لهذا المشهد الشهير و يوم ماسبيرو الدامي الذي دهس فيه أحرار مصر و قتل في هذا اليوم واحد من أبطال الميدان منذ بدايات الثورة و هو مينا دانيال و بعدها أحداث شارع محمد محمود و بعدها أحداث مجلس الوزراء و لن أتحدث كثيرا عن هذه الأحداث لأننا قتلناها بحثا لكن انزل تحت هتلاقيني حاطط صور كتير لأحداث مجلس الوزراء لأن كثير قال علي الثوار بلطجية و خلط بينهم و اضحكوا يا ثورة !!!

الوقت الي بنمر بيه دلوقتي مش وقت حياد...وقت الحياد انتهي و يجب أن نختار جانب تكون معه...لو انت مصري يبقي لازم تشارك و تختار اما الكرامة و الحرية اما ان تكون عبيد, انت ممكن تختلف علي حاجات بتحصل مش بتعجبك بس مش معني كدة انت تكره و تشتم الثورة و الثوار لأنها مش بيعة علي بعض..مش عيب تكون من الثورة والثوار و بتطلب كرامة و حرية و تعترض علي ان تطلع مسيرة مثلا لوزارة الدفاع و مش عيب تعترض علي غلق الميدان مثلا و اه في حاجات غلط بتحصل بس افتكر ان ده علشان احنا أول مرة نعمل ثورة ولسة بنتعلم و فعلا محتاجين يكون في ذكاء ثوري في بعض الأفعال...طب بلاش أكلمك عن الحرية و الكرامة و الكلام ده تعالا نتكلم عن العيش, اتحسن ؟؟ موجود؟؟ الدقيق مش بيتسرق ؟؟ تعالا نتكلم عن السولار الي كل يوم و التاني بيختفي؟؟ طب تعالا نتكلم عن أزمة البنزين؟؟ طب تعالا نتكلم علي المظاهرات الي كل يوم و التاني في الشركات و المصانع, ايه بتقول مظاهرات فئوية؟؟ يا عم كفاية ترديد في كلام بتسمعوا من الحكومة مفيش حاجة اسمها مظاهرة فئوية لأن الناس دي ليهم حقوق و الناس دي بيطلع عينهم علشانكو علشاني و لو انت شتمتهم يبقي ماتستهلش الخدمة أو الحاجة الي بيعملوها علشانك...زي كدة لما كنت تلاقي في طابور الانتخابات اتنين ستات مثلا بيشتموا في الثورة و الثوار مش عارفين ان الي بيشتموهم دول هما السبب في وقفتهم في طابور الانتخابات...و ماتقوليش الثورة خلصت بخلع مبارك و لو انت مقتنع أن الثورة انتهت بخلعه يبقي ماهاش لزمة تكمل قراءة...طب ايه رأيك في كلام العسكر الي بيتغير كل شوية زي كلام اللواء ممدوح شاهين عن الدستور لما قال ان تم وقف العمل بدستور 71 ثم قال ان دستور 71 قائم؟؟ طب لما قال أنا هعمل استفتاء عن 9 مواد فقط و فجأة أصدر مرسوم فيه حاجة 69 مادة بدون استفتاء الشعب عليهم بل وقال أن الشعب قال نعم لحكم العسكر و مدوا الفترة الانتقالية من 6 شهور الي عامين قبل أن يقللوا هذه الفترة لتكون تسليم السلطة في موعد أقصاه 30 يونيو...طب اضحكوا يا ثورة !!!

انزل يوم 25 يناير و اقف مع الثوار و خليك ايجابي و سيب كرسي المتفرج علشان في كتير نزلوا علشانك و ماتوا و لوانت مسيحي في مسيحيين انداسوا عند ماسبيرو علشان قالوا كلمة حق و طلبوا حق و لو انت سلفي أحب أقولك ان سيد بلال مر علي قتله سنة و اسبوعين و لم يحاسبوا من قتلوه ده غير عالم الأزهر الجليل الشيخ عماد عفت و غير البطل الشاب دكتور علاء عبد الهادي طالب كلية الطب الذي قتل برصاص الجيش و كل ذنبه أنه كان يعالج المصابين...انزل علشان الشهيد شايفك, انزل علشان الشهيد هو الي خلاك تنزل تنتخب, انزل علشان لولا الشهيد كان زمانك عايش في بلد رئيس جمهوريتها اسمه جمال, انزل علشان الشهدا لسة بيزيدوا مع كل يوم زيادة للعسكر انزل علشان العسكر أثبت فشله في حكم البلاد خلال 12 شهر, انزل علشان يعرفوا ان الثورة مستمرة, ماتكونش متفرج, الوقت ده ماينفعش فيه الحياد اختار الصف الي هتقف فيه. 

الثورة مستمرة الثورة مستمرة الثورة مستمرة

دلوقتي هسيبكم مع شوية صور كدة اتفرجوا عليها

الست المنتقبة دي لو حد فاكر أيام معارك القصر العيني و كمان محمد محمود كانت بتكون معاها مياه للثوار و لما المياه تخلص تروح تملاها و ترجع و هنا ملازم أول بيعتدي عليها...

  صورة توضح المولوتوف الي بيتحدف من فوق من قوات الجيش...بيجيبوا بنزين و زجاجات و يعملوا مولوتوف علشان يموتوا المصريين...هو ده جيش مصر في ظل حكم المجلس العسكري !!

 صورة للشهيد الشيخ الجليل عماد عفت الذي كان دائما متواجد في الميدان منذ بدايات الثورة في العام الماضي

 صورة الشهيد الدكنور علاء عبد الهادي الذي كان يعالج المصابين في المستشفي الميداني

 صورة تتحدث عن نفسها...قمة ضبط النفس

 مولوتوف الجيش !!!

 الثوار و هم يطفئون المجمع العلمي

صورة قديمة من اعتداء الجيش علي احد الصحفيين الأجانب التابعين لويترز

 نفسي الميدان يرجع كدة تاني

 لو انت ضد الكلام ده انزل معانا كمل الثورة

 الثوار يطفئون سيارة اشتعلت داخل جراج مجلس الشعب بعد أن أشعلها الجيش عن طريق الخطأ و لم يطفأها

 الثوار و هم يطفئون المجمع العلمي

 حال الجيش المصري تحت حكم العسكر

 الجيش المصري تحت حكم العسكر وهو يعتدي علي سيدة عجوز

 سلاح ميري حي و بيقولوا مفيش رصاص...اضحكوا يا ثورة !!!

 الثوار و هم يطفئون المجمع !!! 

 صورة لأية قرأنية تم القائها من فوق المبني من قوات الجيش...كانوا بيحدفوا كل حاجة !!

الثورة مستمرة و ميعادني يوم 25 يناير في ميدان التحرير وكل ميادين مصر....حكم عقلك و اختار الصح !!

قائد الجناح العسكري

من أول دخول الصندوق داخل اللجنة حتي فرز أخر صندوق...شهادتي كمراقب

يوم الأحد 27-11 كنت في اعتصام مجلس الوزرا و رجعت البيت حوالي الساعة 3 صباحا...نزلت الساعة سابعة و بدأت رحلة المراقبة علي الانتخابات و بدأت بمدرسة كلية النصر بالمعادي.

كان خارج المدرسة تواجد للقوات المسلحة (6 عساكر مسلحين و عقيد) و تواجد للشرطة علي باب المدرسة أيضا (2 أمناء شرطة و نقيب) و رؤساء اللجان حاضرين ما عدا واحد و المناديب و مندوب عن الحرية و العدالة و هو شاب قمة في الاحترام اسمه حسين ...تأخرت فتح احدي اللجان حتي الساعة 8:40 بسبب تأخر رئيس احدي اللجان و ده سبب قلق و مشاكل في الطوابير التي امتلأت سريعا و بدأت المشاكل بسبب وجود سيدات كبار في السن في الطابور و كان الارتباك ظاهر علي ضابط الشرطة و عقيد الجيش سابوا و دخل جوة المدرسة و ركزوا علي عضيد الجيش ده لأنه قال كلام مهم جدا هحكيلكم عليه بالتفاصيل تحت شوية...خرجت أشوف الطابور و عدد الناس و شوفت واحدة واقفة و لازقة ستيكر لا للمحاكمات العسكرية و سألتها و قالتلي انها جاية تكتب يسقط يسقط حكم العسكر علي الورقة و ماشية (تبطل صوتها يعني).

بدأ الناخبين في الدخول حوالي الساعة 8:50 و كانت العملية ماشية تمام لحد ما فوجئت بعقيد الجيش داخل احدي الفصول و يتحدث مع سيدة قبل ان تصوت و ماكنش في مشاكل في اللجنة أو حاجة و دي كانت أول مخالفة أسجلها و صورتها كمان و الصورة هتلاقوها تحت خالص.

حوالي الساعة 10:30 مشيت من كلية النصر و روحت علي مدرسة الليسيه...و كان هناك أكتر من 1000 ناخبة في الطوابير و كان الوضع هادئ و منظم بشكل كبير و الجيش هناك عمل الطوابير داخل المدرسة في الملعب نفسه حتي لا يعطل حركة المرور في الشارع و كان تصرف ذكي من الجيش و ماسجلتش أي مخالفة في المدرسة دي.

بعدها توجهت لمدرسة القنال بالمعادي و بدأت فيها المشاكل بسبب عدم وجود ختم علي الورق...لجنتين كانوا المستشارين بيوقعوا علي الورق و لجنة كان المستشار رافض يوقع أو يختم بختمه الخاص و ده سبب حالة من العصبية عند الناس و انهالت الشكاوي عليا و أنا أمثل جهة رقابية و ليس لدي أي سلطة لكن الناخبين كانوا مش فاهمين كدة و بيشتكولي و كان الكلام وقتها أن الأوراق التي لم تختم و ليس بها توقيع المستشار ستحسب كصوت باطل ( وقت الفرز كل ده اتحسب و مانكش في حاجة باطلة منهم ) بعدها مشيت و اتجهت لمجمع المدارس خلف جامع الفاروق و فيها حوالي أربع مدارس هناك و تقريبا كل مدرسة واقف عندها من 500 الي 1500 ناخب و نفس المشكلة تاني ان الناخبين فاكرين ان المراقبين معاهم سلطة فا انهالت الشكاوي تاني و لما دخلت المدرسة دي و كان اسمها المعادي التجريبية كان في امناء شرطة واقفين علي السلم و كان في أون تي في بيصوروا و صوروا معايا و طلعوا الأمناء في الخلفية من غير ما يعرفوا انهم بيتصوروا..طلعت السلم و دخلت أول فصل لقيت فيه بنت من المراقبين معانا في خرجت و هي خرجت ورايا و بتقولي أن في فصل قاعد جواه نقيب شرطة من أول اليوم و مصدقتهاش في الأول...روحت الفصل لقيت فعلا الظابط قاعد بيشرب شاي و مولع سجاير و رجل علي رجل, كلمته بمنتهي الاحترام أنه دي تعتبر مخالفة فا وكيل النيابة رئيس اللجنة طلع انه صاحبه و جايبه يقعد معاه و هو أصلا الظابط ده مش المسؤل عن تأمين هذه المدرسة فا وكيل النيابة قالي 10 دقائق و مش هتلاقيه فا قولتله بس دي اتسجلت خلاص قالي انت كتبتها؟؟ قولتله اعتبرها اتكتبت خلاص و خرجت و بعدها الظابط خرج علي طول و كاميرا أون تي في صوروه و هو خارج من الفصل.

بعدها روحت مدرسة الجمهورية ثم مدرسة القومية و مدرسة ثكنات المعادي و الي كان ملحوظ جدا هو البطء الشديد جدا جدا جدا في المدارس الي بيصوت فيها سيدات و في المقابل سرعة و انجاز عند الناخبين الرجال.

علشان الصورة تكون واضحة معاكم أنا بحكي يومين مش يوم واحد يعني كل المدارس دي بتكلم علي يوم الأتنين و الثلاثاء.

نهاية أول يوم رجعت علي كلية النصر و كان اتمد وقت التصويت حتي التاسعة و وقت التشميع بقي الكل كان محتاس حتي بتوع المباحث...و نقيب الشرطة كان عايز ينقل و يجمع صناديق ال3 فصول في مكان واحد ليكون سهل تأمينهم و بالفعل تم جمع فصلين و كان ال8 صناديق في فصل واحد لكن فصل كان وكيل النيابة بيتصل بالقاضي و رفض نقل الصناديق و كان رفض الظابط لأن الفصل في دور أرضي و زجاج بلا حديد واقي و في زجاج مرتفع يصعب الوصول اليه و تشميعه و وقتها واحد من الموظفين قال البركة في الجيش بقي فا عقيد الجيش قال ال جيش و الشرطة مش الجيش بس و احنا هنا مساعدة للشرطة لأنها لا تسطيع تأمين فصل وحدها. و الكلمة دي أفحمت نقيب الشرطة و خرج من الفصل حتي نهاية العملية و ماشوفتش وشه غير و أنا خارج من المدرسة في حوالي الساعة 11 مثلا....التشميع في حد ذاته كان صعب و ده كان دليل علي أن دي أول مرة نعمل فيها انتخابات...و الفصل كان عبارة عن مدخنة من الشمع الي كان في حلة و بيتم تسييحه علي سخان صغير.

اليومين مروا بأمان و هتكلم عن التجاوزات تحت بالتفاصيل و دلوقتي هتكلم عن الفرز....قصدي مهزلة الفرز !!

مبدئيا كدة احنا يوم الأربع قفلنا المدرسة بالظبط الساعة 7 بالدقيقة و بدأنا في التشميع و العملية اياها و خلصنا و حرزنا الأوراق و المحاضر و كل حاجة و كله تمام و مش عارف ليه وكيلة النيابة حطتني في المحضر و خلتني أمضي و أنا أصلا مراقب مفروض بس مضيت و خلاص و كانت الساعة 8 و ربع و خلاص ال12 صندوق جاهزين و متشمعين و الأوراق و المحاضر و كله زي الفل.

بس مافيش أوتوبيس و كل شوية يجيلنا أنباء عن تجمهر الأهالي أمام بعض المدارس و حجز الناس بالداخل و أنباء عن حجز 36 قاضي بالصناديق و أنباء عن اقتحام مدارس و أنباء عن محاصرة الأوتوبيسات...في نفس الوقت الي كان فيه خناقة الباعة الجائلين مع المعتصمين في الميدان و المولوتوف و كل الأنباء دي بتيجي و احنا محبوسين في المدرسة...كان في حالة ذعر و قلق شديد جدا عندنا بصراحة, لكن بدأت تروح مع الوقت لأننا فضلنا قاعدين في حوش المدرسة لحد الساعة 11 بليل في عز البرد لحد ما أستاذ حسين مندوب الاخوان اتصرف في أجروا عربية نقل عفش(الي بتكون مقفولة دي) و فعلا جت في 10 دقائق تقريبا و اتشحنت الصناديق فيها و ركب جواها الموظفين و وكلاء النيابة و السيدات اتوزعوا علي خمس عربيات ملاكي كانوا موجودين و قبل ما نتحرك بحوالي خمس دقائق وصل الاوتوبيس...بدأ يحصل تخبط في انه يتم النقل مرة أخري للأوتوبيس و التحرك بيه ولا نستخدم عربية الشحن و خلاص...الستات كان كلامهم اننا نستخدم عربية الشحن لأنهم كانوا خايفيين من الاخبار الي بيسمعوها و عايزين يستخدموا عربية الشحن حتي تكون تمويه لأن الأوتوبيس معروف أنه بينقل صناديق...في الأخر اتنقل في الأوتوبيس و بدأ التحرك بعربية شرطة في المقدمة و بعدها الأوتوبيس و محاوط بالسيارات الملاكي ولا أحد يدخل في النص...بعد ما خرجنا علي الكورنيش فوجئنا أن عربية الشرطة غير موجودة و كان تأمين موكب الصناديق بيتم من خلالنا بالسيارات الملاكي و كان في 3 سيارات بتاعت اخوة سلفيين كانوا ظابطين الدنيا كويس.

وصلنا مكان المهزلة...قصدي الفرز و كان المنظر أشبه بمحطة مصر...زحام, ناس شايلين صناديق و بيجروا و يخبطوا الناس علشان يلحوا مكان (مكان تحت عمود نور و لما تشوفوا الصور هتفهموا أكتر)

أول شئ لاحظت صوت عالي و خناق و لما روحت عرفت ان شريف السكرتير (مرشح فلول) بيتخانق مع واحدة ماسكة حملة مصطفي بكري و كان معاها اتنين رجالة و هو لواحده و بعد ما الناس حاشت بينهم و كان علي جنب قولتله بلاش مشاكل علشان محدش يقول انك بتبوظ عملية الفرز (لأن القضاه و النستشارين كانوا بدأوا يشتكوا فعلا).

كانت الحاله و أنا بلف و بشوف الفرز كأنك دخلت مكان مبني بعد هدمه و بتبحث عن أحياء...كنت فعلا ماشي و بساعد كل لجنة شوية و بدون مبالغة الناس كانت متبهدلة...لما تلاقي واحدة معاها عيل عنده أقل من سنة و شايلاه علي كتفها من الساعة 6 الصبح و واقفة بيه الساعة اتنين و تلاتة بعد نص الليل في ملعب كورة في درجة حرارة أقل من 14 تبقي كارثة...لما الوضع يوصل لدرجة ان الستات بتقول عايزيين نخلص لما النور يطلع علشان نعرف نرجع بيوتنا, لما تلاقي مستشارين دخلوا الحمام علشان يشتغلوا في النور, لما تلاقي ظابط مدور عربيته و منور النور علشان يعرفوا يفرزوا تبقي مأساه...والله بدون مبالغة كانت مأساه اخلاقية لكل من كان متواجد في المكان من اول القضاه حتي اصغر موظف و مرورا بالمستشارين و وكلاء النيابة و المراقبين. و من كتر ما أنا كنت ماشي عمال أفرز في كل صندوق شوية و عمال أجيب من كل لجنة فكرة جديدة...يعني لجنة تلاقيهم و هما بيطلعوا ورق القوائم بيحطوا كل حزب لوحده و في الأخر يعدوا و كدة لحد ما في الأخر وكيل نيابة شاب أسمه محمد جمال شيلت ال(Name Tag ) الي كنت لابسه و اشتغلت معاهم و نسيت ان أنا مراقب مفروض...فعلا كان أي حد بيساعد (طبعا بعد استئذان القاضي أو وكيل النيابة). بالمناسبة صحيح خرجت علي حوالي الساعة 4 الفجر كدة أشوف أي حاجة أكلها و لما رجعت لقيت الظابط الي اسمه صلاح السجيني لو فاكرين الي اتهموه انه قتل سائق ميكروباص من حوالي تسع شهور, كان واقف في تأمين مكان الفرز و كان واقف معاه شريف السكرتير مرشح فردي و الدراع اليمين بتاع المرشدي و من أهم فلول الوطني و كان بيحكيله علي المشكلة الي حصلت جوة مع الدكتورة بتاعت حملة مصطفي بكري و لما شافني بيقولي ايه رأيك يا أستاذ أمير شوفت أنا في ثانية جبت رجالتي و كنت هخلص عليها جوة...فا الظابط قاطع كلامه و قاله مش المرشدي بيدعمك فا قاله المرشدي ده ابن كذا ده بيدعم مصطفي بكري...استغرب الظابط و قاله ده انت حبيبه فا قاله المرشدي ابن كذا بيبيع في لحظة !!

الجزئية التي أثيرت في اليومين الي فاتوا بتاعة مصطفي بكري و أحمد الدروي و ناصر أمين بقي...الي كان حاصل و دي شهادة حق أمام الله كان اكتساح للدروي و ناصر أمين و من قبلها عمر رمضان(عمال/اخوان) و من بعدهم أحمد حسن عطية(عمال) في كل الصناديق الي اشتغلت فيها كان هو ده الوضع و بعد ما قيل أن مصطفي بكري نجح سألت ناس و قالوا الي نجح بكري صناديق المعصرة و 15 مايو و التبين و الله أعلم أنا ماشوفتش الصناديق دي حتي أحكم لكن الصناديق الي اشتغلت فيها من معادي و طره و بساتين و زهراء المعادي و المعراج و ثكنات المعادي كان الاكتساح للدروي و بعده ناصر أمين و دي شهادة حق.

لقطات و مواقف

أغلب الناخبين...أغلبهم بمعني الكلمة كانوا نازلين خوفا من الغرامة و ده الي كان ملاحظ لأن بالفعل كتيير جدا كان بعد ما ياخد الورقة الفردي و القائمة مش بيعرف يعمل ايه.

واحدة بعد ما خدت الورقة سألتني أعمل ايه دلوقتي؟ قولتلها حضرتك اختاري اتنين في الورقة الكبيرة و واحد في الورقة الصغيرة. قالتلي أي حاجة يعني؟ قولتلها اه...اختارت أول اتنين هنا و أول واحد هنا والله من غير ما تقرأ أساميهم :D

واحدة بتقولي فين الاخوان؟ فا قولتلها مش مكتوب اخوان حضرتك قوليلي اسم الحزب أو الرمز(بحكم اني محايد يعني) فا بعد تفكير لمدة 3 دقائق مثلا قالتلي رمز الدبابة (الدبابة بتاعت حزب المحافظين بتاع أكمل قطام الفلول) فا قولتلها متأكدة ان الاخوان رمز الدبابة؟ قالتلي أيوة طبعا و خليتها تعلم علي الدبابة فعلا :D

60% من السيدات كانوا كدة لهذا السبب كانت طوابير السيدات بطيئة و الرجال سريعة

و أنا معدي جنب طوابير السيدات كنت أسمعهم بيشتموا في التحرير و في الثوار و في الشهداء الي بسببهم هما بينتخبوا دلوقتي لكن للأسف ماكنتش بقدر أرد علي حد ولا أدخل في اي حوار بحكم الشغل.

طوابير الشباب و الرجالة كلهم ثوريين كانوا و حتي كبار السن.

عقيد الجيش كنت واقف بتكلم معاه لأن اليوم الي قبله وقت التشميع و ريحة الفصل كلها شمع قولت لواحد جانبي بقالي أسبوع بشم غاز و يومين بشم شمع...عقيد الجيش ده كان بيتكلم معايا و وسط كلامنا عدت من وراه ست كبيرة عمالة تدعي لمصر و تقول ياريت تعبنا ييجي بفايدة, فا هو لفلها و قالها يا حاجة حال البلد مش هينصلح غير لما المجلس العسكري يغور(أيوة قال يغور باللفظ) 

ساعتها أنا تنحت لحظة و بعدين ضحكت و سألته ان كان بيتكلم بجد و اتضح انه بيتكلم بجد الجد و انه ضد المحاكمات العسكرية و انه مع تسليم السلطة في أقرب وقت و ان المشير لا يختلف شئ عن مبارك و ده مش رأيه لكن ده لسان حال كل أفراد القوات المسلحة لكنهم لا يريدون الاطاحة به و الانقلاب عليه و قالي ده هيكون تهديد مباشر لمصر و لقواتها المسلحة, و سألته عن الرائد أحمد شومان و أول ما نطقت أسمه اتعصب جدا و قالي شومان ده مسرحية و كومبارس من المجلس و أنه ظابط قوات مسلحة فاشل و فاشل في الشغل العسكري نفسه...يعني لما بيكون مطلوب منه تدريب فرقة أو شئ من هذا القبيل هو فاشل فيه و هو معروف بذلك و أحمد شومان كان بيخدم مع هذا العقيد لمدة طويلة و يعرفه كويس و انه أخلاقه مش تمام و متجوز اتنين و عنده سبع عيال و انه ظابط فاسد و يتبع المجلس العسكري لكنه كومبارس (ده مش كلامي ده كلام عقيد الجيش) 




التجاوزات:

• تواجد نقيب شرطة جالس داخل احدي اللجان مع وكيل النيابة صديقه و هذا الظابط ليس هو المسؤل عن تأمين المدرسة
• نفس الحالة السابقة لكن هذه المرة عقيد شرطة
• مندوبين حزب المحافظين (حزب أكل قطام فلول الوطني) يوزعون رشاوي في حوش المدرسة و المستشار عند ضبتهم اكتفي بطردهم و عدم تسجيل الواقعة
• بعض من شباب الاخوان في الطوابير يحذرون من انتخاب الكتلة المصري لأنهم مرشحين الكنيسة  !!!
• أثناء الفرز كان في ورق بيطير و محدش بيجيبه (أصوات بتضيع)
• داخل لجنة الانتخاب كان العدد بيكون كبير و محدش بيستخدم الساتر و كله بيشوف ورق كله و بيسألوا بعض ننتخب مين...في مدارس السيدات فقط.

دلوقتي هسيبكم مع شوية صور بقي....أنا عارف اني طولت عليكم أنا أسف تاني و ان شاء الله هكتب تدوينة تانية بعد المرحلة التاني للانتخابات...فوتكم بعافية يا رفاق الكفاح !

عقيد الجيش بيساعد ذوي الاحتاجات الخاصة داخل اللجنة

تجاوزات الحرية و العدالة أمام احدي المدارس و توزيع الدعاية في شكل خدمة!!!

تشميع الصناديق و الأحراز من محاضر و أوراق و أقلام من أفراد مباحث الشرطة

أصغر ناخب :D جوة اللجنة

أثناء انتظار الأوتوبيس 

موكب الصناديق و تأمينها من السيارات الملاكي و الشرطة و الجيش كانوا داخل الأوتوبيس

و الأن مع مهازل الفرز...تعالوا نشوف :))

الفرز علي الرصيف

الفرز في الجنينة

وكيل النيابة بيفرز في الجنينة و قاعد علي طرف الصندوق

فرز علي كبوت العربية

فرز في الحمام في غرفة خلع الملابس التابعة للحمام..وكيل نيابة رفض العمل الا في مكان مغلق و به اضاءة...عرف يتصرف

الفرز علي الأرض وسط الرمال و علي الأضواء الهادئة...البيه رومانسي

النور بدأ يطلع و الورق ده كان كل شوية بيطير لأن مفيش حاجة فوقيه و في الصور الي جاية بعد ما طار و الي بيروح مش بيرجع !!

الله يكون في العون فعلا كان اليومين دول حوالي 37 ساعة متواصلين شغل ماحدش يتريق عليهم...

تفوق واضح لناصر أمين علي باقي المنافسين و أحمد الدروي كان أكتر كمان بكتير

قائد الجناح العسكري

تغريدات بعد 18-11 post #Nov18 demonstration Tweets

 From my Account on Twitter http://twitter.com/#!/AmirMoeSoliman

المنصات كلها دقون ولا ايه ؟؟ #nov18 #tahrir

أكتر حاجة عاجباني ان كل متر تلاقي واحدة منتقبة واقفة بتتناقش مع واحدة ليبرالية و تلاقي واحد من تيار غير اسلامي بيتناقش مع واحد بدقن للركبة #Nov18 #Tahrir

و أنا عن نفسي كل الي تناقشت معهم أو ألبهم متقبلين الرأي و الرأي الأخر بس برضو كان في ناس بيحسسوني من كلامهم اني كافر يتبع #Tahrir #Nov18

من نوعية الجلابية البني و الجاكيت الزيتي و الدقن الطويلة و الشال الي علي الراس و كان في معاناه في النقاش مع النوعية دي أوي #Tahrir #Nov18

و من التريند الي كان ماشي و واضح هو اسم حزب النور كانت البانرز كتير أوي ليهم...علي عكس الاخوان الي مكانش ليهم بانرز كتير رم وجودهم القوي جدا

و تناقشت مع أحد السلفيين و الحمدلله وصلنا لنقطة اتفاق في الأخر و اختلفنا في الأخر لما بيقولي أهم حاجة كلنا نتجمع علي مطلب واحد مهم..يتبع

قولتله انت ليه مانزلتش معايا في أي جمعة سواء انت أو الاخوان و سبتونا في الشارع لوحدنا برغم أن مطلب تسليم السلطة ده مطلب قديم..يتبع

قولتله أنا بعتب عليك انك سيبتونا في الشارع لوحدنا و جايين دلوقتي تقولوا نتفق علي مطلب واحد و ده كان اختلافنا الوحيد #Nov18 #Tahrir

الحرية تنتزع ولا توهب يا بني أدميييين

و علشان ضمير الواحد برضو في نقطة مهمة...الاعلام و الناس الي بتظهر فيه هما الي عاملين التضارب بين الاسلاميين و الليبراليين..يتبع

لما حازم شومان قال ليبرالية يعني أمك تقلع الحجاب طبيعي ان الكل يخاف من الليبرالية و لما حمزاوي يقول ان عادي ان مسلمة تتجوز قبطي طبيعي يكرهوه

يبقي الصح نعمل ايه بقي؟؟؟ نسيبنا من تخبيطنا في بعض و نرجع زي أيام يناير و فبراير و نركز فقط علي اصلاح المؤسسات و تسليم السلطة...يتبع

الي فاكر انه صح يهاجم الاسلاميين أو صح انه يهاجم الليبراليين يبقي غلطان...لأن ده هو الي عايزه العسكر...طهر الاعلام الي بيعمل الفتنة...يتبع

شيل العسكر الي خاربوها و وقعوا بين ليبرالي و اسلامي و مسميات مش جاهزين لينا دلوقتي و طهر اعلامك...يتبع

تخيلوا لو عندنا اعلام نضيف مش الدعارة الاعلامية دي...كنت من زمان هتلاقي الكل طلب رحيل العسكر و ماكونتش هتلاقي فزاعة السلفي و الليبرالي دي

طول ما عندنا اعلام مركز علي مقولة حازم شومان بتاعة أمك تقلع الحجاب و مقولة حمزاوي بتاعة زواج مسلمة من قبطي هنفضل مختلفين...يتبع

اوعي يا ليبرالي يكون حمزاوي أو أي مخلوق هو رمزك و اوعي يا اسلامي يكون حازم شومان أو شيخ هو رمزك..لو هي دي النخبة فسحقا لنخبة توقع بين الشعب

و غير كدة و كدة بقي أنا أصلا مش بحب كلمة اسلامي دي يعني ايه يعني ؟؟ من امتي و في شريعة اسمها اسلامي؟؟ متعلمنهاش في كلية العلوم السياسية دي

و برضو علشان الضمير...السلفيين مش زي ما الاعلام بيطلعهم لو خايفيين من حاجة شوفوا التكفير و الهجرة و الحركات الجهادية...اللهم بلغت #Tahrir

اوعي يا ليبرالي تقفل علي نفسك و تقفل دماغك و تسمع أراء ليبراليين فقط...هتكون وقتها منغلق...انزل احتك و اتكلم مع السلفي و مع كل الأراء

و الاسلامي احب أنصحه انه يعرف معني كلمة ليبرالية الأول و ماتكونش منغلق و انزل احتك بالليبرالي و اعرف التفكير و سيبك من التلفزيون..اللهم بلغت

في الدول المحترمة لما الشعب يتظاهر أو يقدم طلبات في خلال ساعات بيكون في رد فعل علي الأقل لو مفيش تنفيذ...بس عندنا لأ...الميدان اتحرق !

ماسبيرو ده يا جدعان أقسم بالله يستاهل الحرق....حد يقول للملثم أن في خط غاز بيعدي من تحت ماسبيرو #Maspero #Thoughts

مبارك مش بني أدم..مبارك فكر يطبق...التحرير يناديك

فكرت أكتب التدوينة دي في شكل مقال قصير أو في شكل نقاط سريعة و منجزة و قررت اني أكتبها في نقاط علشان محدش يزهق و باللغة العامية كمان. من العنوان باين ان المقالة دي للحشد ليوم 18 نوفمبر (الجمعة القادمة).

أول حاجة هتقولها هتقول اننا خربنا البلد و بوظنا البلد...هقولك خربناها في ايه؟؟

هتقولي البورصة واقعة و البلد كلها بلطجية و البطالة زادت بعد ما شركات كتير طردوا الموظفين و مفيش استثمار أجنبي و اسرائيل بتهددنا و مفيش فلوس في البلد و في غلاء للأسعار.

طيب نمسك نقطة نقطة بقي و نجاوب باختصار كدة...

أول نقطة موضوع البورصة, لما تطلع صحيفة تقولك البورصة المصرية اليوم تهبط 30% هقولك هل تعلم أن البورصة ماينفعش تهبط أكتر من 10% في اليوم الواحد و ماينفعش برضو تزيد أكتر من 10% و المعلومة دي بحكم دراستي المتواضعة للاقتصاد و من كلام بيشتغلوا في البورصة بيقولوا ان البورصة بتزيد و تقل و ماشية بمعدل طبيعي لما كان متوقع بعد الثورة.

موضوع البلطجية ده بقي يطول الحديث فيه...هل تعلم أن جهاز الشرطة لديه بيانات كل البلطجية في مصر و لو تم تنسيق بين العسكر و الداخلية هيلموا البلطجية في يومين؟؟ و البلطجية هنا أقصد بيهم من يمارسون البلطجة كمهنة و هؤلاء هم الخطر الحقيقي أما من مارسوا البلطجة بعد الثورة في شكل سرقات فردية دول غلابة و هيتقبض عليهم في يوم و ليلة لو جهاز الشرطة احترم نفسه و اشتغل بضمير و وقتها الظباط هيلاقوا الشعب بيشتغل معاهم أساسا, و اه العسكر سايب البلطجية بمزاجه حتي يترحم المواطن الغلبان علي أيام مبارك حيث الأمن المزعوم.

هتقولي البطالة زادت, هقولك عندك حق بس هقولك برضو ان في وظايف كتير جدا متاحة بس محدش بيرضي يشتغلها لأنها بتكون مرتباتها 400 جنيه و 500 جنيه فا نادر لما الشباب بيوافقوا يشتغلوا فيها...و الحل هنا هو حد أدني للأجور 1200 جنيه...هتقولي طب ما كدة مفيش فلوس و هنطبع فلوس و يحصل تضخم ؟؟ هقولك مش هنطبع ولا حتي ورقة بخمسة زيادة, بس هنطبق حد أقصي للأجور كمان و هقولك مثال:

لو واحد مرتبه 10,000 جنيه و واحد تاني مرتبه 500 جنيه هاخد 2,000 جنيه من أبو عشرة و يكون مرتبه 8,000 و هوزع الالفين دول علي أتنين موظفين حتي يكون مرتب كل منهم 1,500 جنيه...بسيطة و سهلة بس العسكر مش عايز يطبقها.

الاستثمار الأجنبي مش موجود أو قليل جدا و يعود بشكل بطئ جدا و ده حقيقي....بس هيرجع هيرجع لأن هذا البلد بحكم موقعه الجغرافي و الأثار و تاريخ هذا البلد عمر ما الاستثمار ما يغيب عنها و طبيعي أنه يقل يا جماعة لأننا عاملين ثورة و طبيعي انه يعود بعد الغياب و لكن بعد استقرار البلاد...امتي الاستقرار يحصل؟؟ لما يتم تسليم السلطة لرئيس مدني و العسكر يرجعوا أماكنهم الطبيعية.

اسرائيل بتهددك؟؟ افتكروا لما قبل التنحي بيوم و كان يوم الخميس 10 فبراير لما كنا في الميدان و طلع اشاعات ان اسرائيل جهزت قواتها علي الحدود و أمريكا أرسلت بوارج حربية عند قناة السويس و الكلام ده كله...أحب أقولك ان مفيش حاجة اسمها كدة في المجتمع الدولي هي مصر أصلها مش حديقة عامة و أي حد يدخلها في أي وقت و موضوع البوارج الحربية الأمريكية دي كدة كدة موجودة علي طول في المياه الدولية و لما الجيش بتاعني قدر يحمي القناة لم يتدخلوا...و لو انت خايف من اسرائيل خلي المجلس العسكري يسيب السياسة لأهل السياسة و يرجع يركز في الحدود.

موضوع الغلاء و اختفاء الكثير من السلع ده بسبب عدم وجود أليات و مؤسسات للرقابة و لأن السلطة الأن في يد العسكر و هو مهما حصل لم و لن يسطيع ادارة شؤون البلاد...السياسة مش للجيش يا جماعة...لو جبت لعيب كراتيه و قولتله يلعب كورة هيحصل ايه؟؟ هيضرب اللعيبة صب عنه و يمارس العنف...طب لو خليته يكون مدرب أو رئيس نادي؟؟ هيخرب النادي طبعا, السياسة مش للجيش يا جماعة الجيش المصري عظيم لكنه الأن يخسر الكثير و يخسر التاريخ....التاريخ لن يذكر محاسن لهذا الجيش العظيم لأنه "خربها و قعد علي تلها"

طيب و بعدين يعني عايز ايه من كل الرغي ده؟؟ عايز أقولك أن كل ده سيتم حله اذا تم تسليم السلطة لرئيس مدني.

هننزل يوم 18 نوفمبر نقول للعسكر يسلموا السلطة في معاد أقصاه مايو 2012 يعني بعد سبع شهور من الأن . 

نقاط مهمة: 

• يتم محاكمة أكثر من 12 ألف مواطن مصري بمحاكمات عسكرية غير شرعية و الكثير منهم نشطاء سياسيين يعني الي بيقول رأيه بيتحاكم عسكريا...ده مبارك معملهاش!!!
• وثيقة علي السلمي و التي يسعؤ لها العسكر تعطي للعسكر مطلق السلطات و تجعل من الرئيس قائد أعلي لمجلس الدفاع الوطني...يعني قائد أعلي للقوات المسلحة زي المخلوع مبارك!!!!
• العسكر أصدر بيان فيه الجدول الزمني للانتخابات التشريعية و الرئاسية و فيها انه هيفضل في السلطة حتي يناير 2013 !!!!
• هل تعلم أن في أسوان من يومين تم مقتل مركبي غلبان علي يد أحد أمناء الشرطة؟؟ بس شهادة حق تم تحريز سلاح الأمين...بس لسة الداخلية بلطجية!!
• علاء عبد الفتاح المدون و الناشط المعروف تم استدعاؤه و حبسه و اتهامه انه أتلف منشئات للقوات المسلحة و حيازة سلاح و تجمهر و اعتداء علي أفراد من القوات المسلحة في أحداث ماسبيرو...لو سوبرمان مش هيعمل ده كله و لا تعليق.

دي صورة للقوات المسلحة مع احدي الصحفيين العزل و ما خفي كان أعظم!

أنا طولت عليكم أوي و مش هطول أكتر من كدة شوف الكلام الي فوق و حكم ضميرك و أعمل حاجة علشان خاطر البلد و علشان خاطر ولادك يعيشوا في بلد محترم و بكرامة و يكونوا فخورين بيك لما يكبروا و مايقولوش بابا كان ماشي جنب الحيط و خايف و ساب البلد تضيع زي ما احنا ما قولنا لأهلنا...حكم عقلك!!

اوعي يا مصري تخون أفكارك...مجلس عسكر هو مبارك!!

يعني ايه القائمة النسبية و ايه الحسابات...افهم قبل ما تروح تصوت

في نظام القائمة النسبية المغلقة اسلوب تحديد النتيجة هو نظام التمثيل النسبي
وفي النظام ده كل قائمة بتحصل على عدد من المقاعد المخصصة للدائرة الانتخابية حسب نسبة الأصوات الصحيحة اللي حصلت عليها في الانتخابات

فلو فرضنا ان فيه دائرة انتخابية فيها 10 مقاعد بتتنافس عليها 3 قوائم وكانت النتيجة :

القائمة (أ) حصلت على 60 % من الاصوات
القائمة (ب) حصلت على 20%
القائمة (ج) حصلت على 20%

الموضوع بسيط في الحالة ديه
القائمة (أ) هتاخد 6 مقاعد
القائمة (ب) هتاخد 2 مقعد
القائمة (ج) هتاخد 2 مقعد

بس الواقع العملي مش بالسهولة لانه بيكون عندنا كسور, طيب ايه بيكون الحل؟

تعالوا الأول نتعرف على حاجة مهمة اسمها المعامل الانتخابي

المعامل الانتخابي يعني تقسيم مجموع الأصوات على عدد المقاعد اللي في الدايرة وحاصل القسمة هو ده اسمه المعامل الانتخابي مثلاً

لو عدد الأصوات الصحيحة في الدائرة = 100,000 صوت
وعدد المقاعد في نفس الدائرة = 10 مقاعد
هنقسم 100,000 ÷ 10 = المعامل الإنتخابي اللي هو 10,000 صوت


نضرب مثال

لو فيه دائرة انتخابية فيها 10 مقاعد و4 قوائم حصلوا على 100,000 صوت موزعة كالأتي

القائمة (أ) حصلت على 47,000 صوت
القائمة (ب) حصلت على 30,000 صوت
القائمة (ج) حصلت على 7,000 صوت
القائمة (د) حصلت على 16,000 صوت


ازاي هتتوزع الـ 10 مقاعد على الـ 4 قوائم ؟
تعالوا نطلع المعامل الانتخابي
عدد الأصوات 100,000 صوت ÷ 10 مقاعد = المعامل الانتخابي اللي هو 10,000 صوت


فهيكون التوزيع كالتالي

القائمة (أ) 47,000 صوت ÷ 10,000 = 4 مقعد والباقي 7,000 صوت
القائمة (ب) 30,000 صوت ÷ 10,000 = 3 مقعد والباقي صفر صوت
القائمة (ج) 7,000 صوت ÷ 10,000 = لامقعد والباقي 7,000 صوت
القائمة (د) 16,000 صوت ÷ 10,000 = 1 مقعد والباقي 6,000 صوت

هنا سوف نجد انه تم توزيع ٨ مقاعد والباقي مقعدين

ندور علي اكتر قوائم ليها اصوات متبقيه

القائمة (أ) ليها 7,000 صوت .. فتاخد مقعد
القائمة (ج) ليها 7,000 صوت فتاخد مقعد

النتيجة النهائية

القائمة (أ) : 5 مقاعد (بـ 47000 صوت)
القائمة (ب): 3 مقاعد (بـ 30000 صوت)
القائمة (ج): 1 مقعد (بـ 7000 صوت)
القائمة (د): 1 مقعد (بـ 16000 صوت )

برجاء الملاحظة انه يتم استبعاد اي قائمة لا تحصل علي نصف في المائة من اجمالي عدد الأصوات الصحيحة التي حصلت عليها جميع قوائم الحزب (أو الائتلاف الحزبي) على مستوى الجمهورية .

تم النقل عن
http://ummahwahda.blogspot.com/2011/09/blog-post_28.html

افهم و حكم عقلك...الشعب يريد تحكيم العقول

 لما تقوللي مفيش أمن بعد 9 شهور....رغم المليارات اللى إتصرفت على الشرطة, ...يبقى في حاجة غلط 
* لما تقوللي إن الفوضى هتستمر لحد شهر 5 / 2013 موعد إنتخاب الرئيس ...   يبقي فيه حاجة غلط 
  
*لما تقوللي إن لحد النهاردة مفيش و لا جنيه رجع من فلوسنا اللي عند الحرامية ...يبقي فيه حاجة غلط 

* لما تقوللي إن أسبانيا أخدت من حسين سالم 32,5 مليون يورو ومباني بقيمة 10 مليون يورو ........  و احنا مشوفناش منه مليم من فلوسنا اللي سرقها  .......... يبقي فيه حاجة غلط

* لما تقوللي إن خزينة الدولة مفيهاش فلوس لتحقيق مطالب المواطنين ... مع إن في مصر ألاف الموظفين بيقبض الواحد منهم فوق المليون جنيه شهريا و ومساعدينهم  بيقبضوا مئات الآلاف في الشهر .... و كمان رجال الأعمال عليهم 100 مليار جنيه ضرائب للدولة ....  يبقي فيه حاجة غلط 

* لما تقوللي إن أحد فلول الحزب الوطني هدد بعزل الصعيد و قطع الكهرباء عن مصر ....  لو تم منعهم  من الترشيح لمجلس الشعب .... و محدش حتي رد عليه ................يبقي فيه حاجة غلط

* 
لما تقوللي إن كل الناس اللي بتعارض خونة و عملاء و مأجورين .... من غير حكم واحد قضائي يقول كده ....
و لا حتي تحقيق ................ يبقي فيه حاجة غلط

* لما تقوللي إن فيه مؤامرات داخلية و خارجية علي البلد ...... و ترمي اتهامات يمين و شمال... من غير ما تكشف أشخاص و لا مؤامرة ....و أنت عندك أمن وطني و مخابرات و جيش ............ يبقي فيه حاجة غلط

* لما تقوللي إن المشير و عمر سليمان و العيسوي شهدوا في المحكمة ببراءة مبارك من كل التهم ....  رغم إن البيان رقم 52 للقوات المسلحة ...  قال رفضنا أوامر بإطلاق النار علي المتظاهرين .....يبقي فيه حاجة غلط

* لما تقوللي إن الثوار بيتحاكموا عسكري ..... و مبارك قاعد في مستشفي 7 نجوم .... و نائب رئيس الشرطة العسكرية بيضرب تعظيم سلام للعادلي في المحكمة ........ يبقي فيه حاجة غلط

* لما تقوللي إن تونس انتخبت لجنة تأسيسية لوضع دستور جديد و تشكيل حكومة انتقالية ..... و مصر لسة بتعمل مجلس شعب هاينتخب لجنة تأسيسية لوضع دستور بعد سنة .. و مش هيشكل حكومة .. يبقي فيه حاجة غلط

* لما تقوللي المشير مش طمعان في الحكم .. و تلاقي حملة لترشيحه للرئاسة.. يبقي فيه حاجة غلط
*
لما تقوللي إن المجلس العسكري بيعد وثيقة مباديء فوق دستورية .... تجعل منه قوة فوق المحاسبة ..... و فوق الشعب و الحكومة .... و تجعل منه دولة داخل الدولة .........يبقي فيه حاجة غلط
****
لما يسألك ابنك : - ليه يا بابا سيبت الثورة تضيع سنة 2011 ...؟؟؟؟ ومعملتش المستحيل عشان مستقبلنا يبقى أفضل ؟؟؟  ومتقدرش ترد عليه ..... يبقي فيه مليون غلط

طيب إيه الحل ؟؟؟ نتمسك برئيس مدني قبل 4 / 2012 .. ، الاستقرار إن ناس قلبها عليك انت تحكم ... الاستقرار ان المدني يحكم  و العسكري يدافع عن الحدود . الحل أن مش ممكن المجلس يحكم مصر أكتر من كدة, الحل أن رئيس مدني أو مجلس مدني نقدر نحاسبه هو اللى يمسك, الحل أن ننزل يوم 18 / 11 و نقول لأ للظلم و لأ لخراب مصر

يا شباب مصر و أحرارها :-إحنا بنعيش مرحلة تحول خطيرة من عمر مصر... بلدنا واحدة و متسقبلنا واحد .. والفرصة في إيدينا دلوقتي عشان نبقي أحسن بلد .. الخير في مصر كتير قوي ..بس النهب أكتر . مش عايزين نتسرق تاني ..ولا أمن دولة يعذبنا تاني ..فات الكثير ... و استحملنا الكثير .. و اللي جاي أسهل بكتير ..بس المهم:- نكمل صح.

أنا راجع الميدان 18 / 11 ..... راجع أطالب بالإستقرار و إنهاء المرحلة الإنتقالية ......... العدل و الحرية و حق الشهيد .....أو الشهادة في سبيل الحق ....   مصري – حر – مستقل

 املى الورق ده يكون فى كل حته فى مصر يكون فى ايد كل مصرى وفى عقله كمان يكون فاهمه ويعمل بيه مش مطلوب من اللى بيوزع غير انه يقتنع باللى مكتوب علشان يعرف يقنع اللى ادامه جدد النيه وحدد الهدف واعزم الامر وتوكل على الله هو وحده اللى قادر يرجع حب الناس تانى لينا ويخلى الشارع معانا مش علينا واضح من كلامى ان انا بنت عاديه خالص لا تبع حركه ولا حزب ولا اى حاجه احنا مصريين فقط لا غير ومصريين على انقاذ ثورتنا

النصوص المشبوهة في وثيقة علي السلمي التي تسلم الثورة للعسكر

نص وثيقة علي السلمي التي تسلم الثورة للجيش

بند رقم9 من الوثيقة يمنع مناقشة ميزانية الجيش في البرلمان وينص على وضعها رقم واحد في الموازنة العامة 

يتم اختيار 80 عضوا من الجمعية التأسيسية لوضع الدستور من خارج مجلس الشعب.. والحد الأقصى لمشاركة الأحزاب والكتل 5 أعضاء 

إذا لم تنته الجمعية التأسيسية من الدستور خلال 6 شهور يختار العسكري جمعية جديدة بحريته لوضع الدستور خلال 3 شهور 

للمجلس العسكري حق طلب إعادة النظر في مواد مشروع الدستور إذا تضمن نصا يتعارض مع مقومات الدولة والمجتمع والحقوق والحريات العامة 

ننشر النصوص التي أثارت الجدل في وثيقة السلمي للمبادئ الدستورية .. ففيما بدأت الوثيقة بنص مطمئن ينص على أن” الشعب هو مصدر السلطات و لا ينبغي بأي حال من الأحوال المصادرة علي إرادته بوضع مبادئ فوق دستورية لا تتغير و دونما الحاجة الي إعلان دستوري بشأنها او غيره حيث تكفي إرادة الشعب” فإن كثير من النصوص جاءت لتخالف هذا النص وتفرض حصانة على جهات بل وتضع سلطتها فوق سلطة الشعب نفسه

حيث جاء البند رقم ٩ من الوثيقة ليضفي حصانة خاصة على القوات المسلحة وميزانيتها بدعوى حماية الأمن القومي وهو ما اثار جدلا واعتراضات كبيرة بين الأحزاب حيث نص البند على

” يختص المجلس الأعلي للقوات المسلحة دون غيره بالنظر في كل ما يتعلق بالشئون الخاصة بالقوات المسلحة و مناقشة بنود ميزانيتها علي ان يتم إدراجها رقم واحد في موازنة الدولة كما يختص دون غيره بالموافقة علي اي تشريع يتعلق بالقوات المسلحة قبل اصداره.”

فيما نص البند رقم ١٠ على ” ينشأ مجلس يسمي مجلس الدفاع الوطني يتولي رئيس الجمهورية رئاسته و يختص بالنظر في الشئون الخاصة بوسائل تأمين البلاد و سلامتها و يبين القانون اختصاصاته الأخرى

وجاءت معايير تشكيل الجمعية التأسيسية لوضع الدستور لتثير الكثير من الجدل وتضع الكثير من علامات الاستفهام حول نوايا القوات المسلحة حول مستقبل البلاد فطبقا للنصوص جاءت المعايير كالتالي :

اختيار ثمانين عضوا من خارج مجلس الشعب والشوري النسبة الباقية يتم اختيارها من مجلس الشعب بأحد أقصي خمس أعضاء للحزب او الكتلة البرلمانية و حد ادني شخص.

و جاء نص البند الثاني كالأتي :

إذا تضمن مشروع الدستور الذي أعدته الجمعية التأسيسية نصا أو أكثر يتعارض مع المقومات الأساسية للدولة و المجتمع المصري والحقوق والحريات العامة التي استقرت عليها الدساتير المصرية المتعاقبة بما فيها الإعلان الدستوري الصادر في ٣٠ مارس ٢٠١١ والإعلانات الدستورية التالية له، يطلب المجلس الأعلى للقوات المسلحة بما له من سلطات رئيس الجمهورية في المرحلة الانتقالية من الجمعية التأسيسية إعادة النظر في هذه النصوص خلال مدة أقصاها خمسة عشر يوما فإذا لم توافق الجمعية، كان للمجلس أن يعرض الأمر علي المحكمة الدستورية العليا علي أن تصدر المحكمة قرارها في شانه خلال سبعة أيام من تاريخ عرض الأمر عليها، و يكون القرار الصادر من المحكمة الدستورية العليا ملزما للكافة وجميع سلطات الدولة

وحول الجمعية التأسيسية نصت الوثيقة على ” إذا لم تنتهي الجمعية التأسيسية من إعداد مشروع الدستور خلال الستة أشهر المنصوص عليها في الإعلان الدستوري لاي سبب من الأسباب ، يكون للمجلس الاعلي للقوات المسلحة بما له من سلطات رئيس الجمهورية – تشكيل جمعية تأسيسية جديدة وفقا للمعايير المتوافق عليها لإعداد مشروع الدستور خلال ثلاثة أشهر من تاريخ تشكيلها و يعرض المشروع علي الشعب لاستفتائه عليه خلال خمسة عشر يوما من تاريخ الانتهاء من إعداد هذا المشروع.

و اعتبرت الأحزاب المشاركة في الاجتماع تلك النصوص تعبير عن تدخل واضح للمجلس العسكري في وضع الدستور و الالتفاف علي إرادة الشعب المصري

تعليقات بعض من الشخصيات:

د. مصطفي النجار: سأنسحب من الترشح للبرلمان وأقاطع الانتخابات اذا تم اقرار وثيقة السلمى - بخطاياها الحالية - باعلان دستورى منفرد من المجلس العسكرى

د. أحمد شكري: تلقيت دعوة من الدكتور علي السلمي لحضور اجتماع لمناقشة المبادئ الاساسية 

للدستور و معايير اختيار اللجنة التأسيسية للدستور عن حزب العدل .

لبينا الدعوة كحزب يتعين علينا المشاركة في أي فعالية سياسية تناقش مصالح الوطن 

الا أنني فوجئت ببعض الحاضرين الذين لا يمثلون الا أنفسهم حضروا لكي يناقشوا مستقبل أمة علي 

حافة التحول الديمقراطي، لا توجد معايير واضحة لاختيار الحاضرين و لا توجد اي آلية للتحقق من 

الحاضرين مما جعل القاعة يسودها جو من الاحتفالية. 

قرأت المسودة

تلك النصوص تعبر عن تدخل واضح للمجلس العسكري في وضع الدستور و الالتفاف علي إرادة 

الشعب المصري. و لذلك قررت ترك الاجتماع قبل ان يبدأ

عصام سلطان للجزيرة مباشر: أكثر من نصف الحاضرين باجتماع السلمي لمعايير تشكيل اللجنة التأسيسية للدستور هم من أعضاء ورموز الحزب الوطني المنحل

 أسماء محفوظ (من داخل قاعة اجتماع السلمي) للجزيرة مباشر : الوثبقة تحتوي على مادة تلزم مجلس الشعب القادم بعدم مخالفة بنودها وإلا فللمجلس العسكري أن ينحي المجلس ويختار بمعرفته لجنة وضع الدستور (يعني مجلس الشعب مالوش لازمة العسكر متحكم)

محمد صبحي زعيم الفلاحين (من داخل قاعة اجتماع السلمي) للجزيرة مباشر: ما يحدث هنا يمثل صدمة لكل الوطنيين في مصر .. الوثيقة تضع البلد بكاملها في يد المجلس العسكري يتصرف فيها كيف يشاء

دكتور مصطفي النجار وكيل مؤسسي حزب العدل

دكتور أحمد شكري وكيل مؤسسي حزب العدل